முல்லா நஸ்ருதீன் வெளியூர் பயணம் புறப்பட்டிருந்தார். படகைப் பிடிக்க எண்ணி அவசரமாக ஓடினார். படகைத் தவறவிடக் கூடாத நிலையில் இருந்தார்.
அவர் படகுத்துறையை அடைந்தபோது, படகு, நகர்ந்து கொண்டிருந்தது. கரையிலிருந்து எட்டிக் குதித்துப் படகில் காலூன்றினார். அப்போது, நிலைதடுமாறி, படகினுள் குப்புற விழுந்துவிட்டார். முழங்காலில் சிராய்ப்பு ஏற்பட்டு ரத்தம் வழிந்தது. ஆடை கிழிந்து போயிற்று.
ஆனாலும் மகிழ்ச்சியாக எழுந்தார்.
வியப்போடு அவரைப் பார்த்த பயணிகளிடம், "நான் தாமதமாக வந்தாலும் படகைப் பிடித்துவிட்டேன்." என ஆனந்தித்துக் கொண்டே கூறினார்.
பயணியருள் ஒருவர், "உங்களைப் புரிந்துகொள்ளவே முடியவில்லை முல்லா!! இந்தப்படகு புறப்பட்டுப் போகவில்லை. கரையை நோக்கியல்லவா வந்து கொண்டிருக்கிறது. அதற்குள் என்ன அவசரம்?" என்றார்.
எங்கோ சென்றுசேர நினைத்து, வாழ்நாளெல்லாம் ஓடி, இறுதி சமயத்தில், உங்களது ஓட்டம் வீண் என்று தெரியவந்தால், அதுவரை வாழ்ந்த வாழ்க்கைக்கு அர்த்தமிருக்காது. புறப்பட்டுச் செல்லும் படகிற்குப் பதிலாக, திரும்பவரும் படகில் உட்கார்ந்தது போலாகிவிடும்.
அடுத்தவர் பாதையில் கண்ணை மூடிக்கொண்டு பயணிக்காதீர்கள். அவர் சென்றுசேர வேண்டிய இடம் வேறாக இருக்கலாம். உங்கள் இலக்கை நோக்கிய பாதையில் பயணிப்பவர்களோடு செல்லுங்கள். அதுவே இருவருக்கும் உதவிகரமாக இருக்கும்.
அவசரகதியில் என்ன ஏதென்று தெரியாமல் பயணிக்காதீர்கள். முல்லா அந்தத் தவறைத் தான் செய்தார். படகு எங்கு செல்கிறதென்று, சரியானவரிடம் கேட்டு உறுதி செய்திருந்தால், அவர் தவறான படகில் ஏறி ஆடையை கிழித்திருக்க மாட்டார். ஆகவே, உங்கள் இலக்கிற்கான, சரியான பாதையில் தான் பயணிக்கிறீர்களா என்று அவ்வப்போது உறுதி செய்து கொண்டு பயணியுங்கள். சற்று நேரமானாலும் பரவாயில்லை; சரியான பாதையில் பயணியுங்கள்.
____________________________________________
Keywords: குட்டி கதைகள், சின்ன கதை, நீதிக் கதைகள், ஜென் கதைகள், நிமிடக் கதைகள், தத்துவக் கதைகள், தன்னம்பிக்கை கதைகள், ஆன்மீக கதைகள், தேனித் தென்றல், படித்ததில் பிடித்தது, முல்லா கதை, முல்லா நஸ்ருதீன், சரியான பாதை, வாழ்க்கை பயணம், படகு.
கருத்துகள் இல்லை:
கருத்துரையிடுக